Anmarcord piò di Giuseppe Lorenzi (Cattolica)
An gnera alma viva ma la straeda
al caligh al bagna enca ioss
ven fora un om sal lumen cés…
l’era al mi ba, in pena sal cor tli maen
parchè an s’era ancora artorne…
“Fiol, a giva cu t’era success qualchicò…
l’è questa l’ora d’arturnè…
s’ved cal ciel ut vo ben
a ho prighè par te,
a so sigur cal Signouren e capés.
Un basta ancora da patì sora sta tera…
a ho un bel magon nè paesa invell…
cous’co passè…”.
Pien pien la lusa la si smorta,
a guerd e bizer svoide,
a pens ma un insugne…
a so dre a durmì ma la tevla
e adess, sa zaverie, anmarcord piò…
Es Vèc di Giuseppe Lorenzi (Cattolica)
Su gnè paesa tla vida e te mond,
alora, quela, tla trov da Palota
te chempsent, da mort…
Si te piò ad stentan,
ti uspidel int guerda gnenca se te un spin
anzi, si pò it fa andè prima,
sno cum la fa l’Inps a paghè toett al pension…!!…
Ma la television, intent
i dis sempra chi è ‘na masa ad vèc, ca sin trop…
cl’aumenta l’età in poc an…
i se i studia da fei andè prima, in te paes.
Quii sai baioc i resta, quii sa gnint i va…
l’arvenzarà emenc un bus da splis
o i farà cement enca i lé?…
Mael, malann e loss ma doss…!!!
[img align=left]http://www.lapiazza.rn.it/maggio04/rassegna_poesia_dialettale1.jpg[/img] Cattolica, primi anni ’30: le ricamatrici di via Giordano Bruno e di via Libertà. In alto da destra: Marta Vanni (‘Martìn’), Rosina Francolini (in Binda), Maria Frontini (in Bianchi), Giuseppina Vanni (sorella di ‘Martìn’), Vincenza Paolucci (‘Mureli’), Maria Simoncelli ‘dla Madalena’, Maria Morosini (in Grandicelli). Sedute da sinistra: Lina Cecchini (‘Lina dla Celesta’), Erminia Torriani (‘Erminia dal Cafè’), Giulia Mariani, Albucci Elisabetta (‘Lisa dla Bubona’), ?, ?.
(Archivio fotografico Centro Culturale Polivalente di Cattolica)
L’ov binidétt di Annunzio Livi (Cattolica)
El dì ad Pasqua an’era perfétt
se an’s magnèva l’ov binidétt
e per rispité stà vècia tradizion
at tùt li chésie is priparéva in temp per la funzion.
Per nùn dla campagna ch’ a j’avimie li galèn
l’era un prublema ch’al risulvimie bèn,
tant’è che la mì nòna la mitiva via li più bélie
t’un panèr slà paja e tùtie uguélie,
e a la v-gilia la li féva bulì
finchè li s’era tùtie indurì.
Dop avelie mes t’n’algacia culuréda
im dèva ‘na béla racmandéda,
ad fé la massima attenzion
e ad ciapé bèn la bindizion.
Quel ch’an ho propia mai capì
parché i mandéva snò m’ai burdél li ovie a binidì!
Mi a j’andéva s’él piaser, ma senza rid,
parché dop ad tre chilomitre fat a pid,
quand a j’arivèva ma la cisa, am duvì crèd,
a s’era strac e anche sudèd.
Seguend pù del prét li istruzion
a tniva ben élt él mi fagott per la bindizion
snò che spess l’esagereva sa l’aspersorie,
él bagnéva più la genta ca n’é li ovie,
bé pacènza; mi am sintiva sudisfatt
él mi duvèr a l’aveva fatt.
Sicché él dì ad Pasqua, prest a la matèna
i trèva fora li ovie da la vidrèna,
e tùta la fameja, dal più véc al più znèn,
i magnèva èl su ov, ma la tévla tùt insèn,
sa la pagnota bsarèsa fata s’él pevara e furmai,
che ad mastighèla an’s fniva mai.
Mentre li donie li recitéva un’orazion
per invuché la divina protezion,
che uj fuss sempre serenità e pésa
per tùta la fameja e per la chésa,
nun znèn, a gudimie per clà cerimonia semplice e sincera,
che la crijéva una simpatica atmosfera.
La mi mà tra la matra e él talièr indafaréda,
sa li ménie intrisie d’impast e infarinéda,
li coc-le rotie la li mitiva t’un scartuzèn
da brusè drent t’el camèn,
in modi che él fog, mitiche purificador,
él mandèss tl’éria un messag ad pésa e d’amor.
Probabilmént qualchi-cò a j’avin sbajé per stà funzion
parchè pass la festa u s’arturnéva tlà stessa situazion,
a lidghè, a scagnaré, li rabiadur,
mentre mi d’avè fatt él mi duvèr a s’era sigur,
forse anche él fun ch’él scapéva dal camèn
a n’aveva funziuné propia bin-bèn,
parché se a guardéva in gir per é mond
u j’era ‘na cativèria senza fond!
Ma chi temp i là, l’era quasi un gnint
paragunand ma ogg, a sò cunvint:
dop ad tént’an che a magnén l’ov binidétt,
a viv sta’ situazion a sin custrétt,
priputènza, viulènza e guéra
che oramai li ha invistì tuta la téra.
Tant’é che a realiz un pensier s’un gran turmént,
snò un dì, i dura i bon proponimént!
La camnèda ti’an di Massimo Giorgi (Mondaino)
A sént la campèna cla sona
A sént è mèr cun si sént.
L’è un ètre dé
L’è un cor ch’é bat,
L’è è savor d’na mela
C’ho sempre Magnèd;
L’è la vita cl’am chièma
E l’an sfa sintì.
L’è è savor d’na mela
Che sno adès ho cnusciud
L’è l’urle de mèr
C’ho sempre santud.
Al foie di Mario Foschi (Morciano di Romagna)
Uiè dal foie tla cima d’un batech
tachedie m’un rem d’un elbara cl’è sech
e basta appena un sofie d’nà burasca
che scrola un po’ e batech che queglie al casca.
Al foie mortie cal casca ad una ad una
e vent ul coi, ul frola e pò ul raduna
ul mocia t’un canton e i lè al marces
al fà piagn e cor te veda come al fnes.
Enca nun a sem foie tla cima d’un batech
tached m’un rem cl’è ogni dè piò sech
pò quand l’ariva all’improvisa la burasca
e nost batech us romp e nun us casca.
Dop cu se casc sa vlem dì la verità
quel cu c’iaspeta purtrop nisun ul sa
ma se avesme da fnì come al foie cal marces
cus ca sem avnù a fè at ste mond un si capes.
L’è Primavera di Giovanni Martelli (Montefiore)
L’è artorna finalment la Primavera
u m’ha basé te lett un rag ad sol
cl’è pas da ‘na fesura dla persièna
che la s’è scorda già dla tramuntena.
A so’ selt via da e lett, ho avert la fnestra
e a iò sintì tla facia la careza
d’un’eria tèpda, dolcia, delicheda
dai fiùr dla primavera profumeda.
Intorne e campanil dla cisa antiga
al strid e al vola a storme al rundanine
e sora e davanzèl d’un grand finistròn
i tuba inamured un pèra ad pciòn.
L’an dorma piò, la è sveggia la natura
e tott intorne i chemp vistid ad verd
it mett drenta te cor un’alegria
cl’an lascia e post ma la malincunia.
Tla sent la primavera, tla respir
l’è com una vampèda ad vita nova
e i prè tott verd sli margheritie in fior
i pèr un let già pront per fè l’amor!
Nostalgia di Giovanni Martelli (Montefiore)
Quand us fa nota e intorne u si fa scur
tent voltie ut ciapa la malincunia
pinsand mi dé ch’i pasa, i vola via
e i’ann i pesa e t’an ti sent sigur
d’arvèda ancora quand e spunta e sol.
La chèsa cla pareva tenta znina
ades la è granda e la n’è piò pina
de ciass ch’i feva sai su giogh i fiol
che iè dvent grand e i chempa da per lor.
Us pasa guasi tòtta la giurnèda
spirand cl’ariva cla telefuneda
cl’ac fa sintì ancora genitor.
Alora u n’è la nota se su scur
cla porta drenta la malincunia
ma l’è sintì te cor la nostalgia
di fiol ch’iè grand e i pensa me futur!
[img align=left]http://www.lapiazza.rn.it/maggio04/rassegna_poesia_dialettale2.jpg[/img] Cattolica, 1939 circa. Si riconosce in basso da sinistra: Giuseppina Cremonesi (bambina), Bianca Cermaria (al centro). In alto a sinistra: Severina De Biagi (classe 1911). Le altre quattro persone con magliette a righe sono turisti.
(Archivio fotografico Centro Culturale Polivalente di Cattolica)
Chent ad sirena di Mario Tonini (Riccione)
Un canel d’aqua un sepera mo l’unes
du region, du province e du cumun
d’Italia, che sia Romagna o Merche l’è listes.
Un più znin, un più grand, ognun
sun proprie nom mo jà fra lor e port
c’ui ten per mena, uj fa dvantè tut’un.
Du lucine, du faret chi fa pecia e smort
sustnud da du moli da parè ognun lima
te fer cla grata e mer, al lota per un ort
ad aqua cl’è sempre stè rifug prima
mo enchè, da sta cità, punt ad partenza
per i su mariner che lasand e port, sla cima
dli palede i deva l’ultme salut, senza
un si puteva partì, mal mame, spose, murose
ca gl’armaniva aspitè prigand la Providenza
dla Madona per lor, done curagiose
che quantè una berca lan arturneva
aglera sa cli punte a guardè e mer ansiose
spirand d’arveda quej che jamancheva,
c’un fusa una disgrezia, sol un riterd
mo dli volte, ma ste port cu gl’aspiteva,
cal prue lin è artorne e chi sguerd
ad done jè armast a fisè e mer, ancora
a spirè e per nu vles rasignè a perd
e proprie fiol, e proprie om, ec che agl’implora
e CEL da fele dvantè pes per andej incuntrè
enchè sota l’aqua duvè ch’jà trov l’ultma dimora
e ste CEL l’ha fat in modi c’us putes realizè
sta volontà, cli done ormai fese a marena
u gl’ha trasfurmè in pes, a mità per navighè
e mità dona per cantè sempre la su pena
sna melodia cu la purtesa un sefie ad vent
mi mariner ch’iascolta cantè la su sirena
e a Catolga, Gabec, e port dvanted strument,
dè e nota che chent e fa santì cl’è invucazion,
vosa ad cli sirene cal chenta e su turment
per cl’amor c’un e più torne, per la disperazion.
Gabecc, vosa de port di Mario Tonini (Riccione)
A Gabecc am ni so incort
che l’eva vosa e port,
una nenia cumè un chent
purted da un fil ad vent,
trest, un chent ad pena,
vosa fors d’una sirena.
Pscador di Giuseppe Lo Magro (Riccione)
Un vol ad bèrche
um strésa i pansier
lis ved al vose
ilà giò.
Da sora
la Louna
zéta zéta
la guèrda al rede
ch’lis afoga
pianèin pianèin.
La siva di Giuseppe Lo Magro (Riccione)
Lodla te vènt
un vol ligir
sora i ciòf dl’èrba.
Una rosa ad pièmb
da una siva.
E vènt us ferma.
Lodla tl’èrba
ancora un respir
e pò e tu cor
e darà e su culor
mi ciòf ciachèd.
La giostra di Vincenzo Cecchini (Cattolica)
Sla lus daventi i oc
al mond l’è tut più scur.
Al per che tut ni co l’ava da fnì.
Di dre li spal, tal ciel,
al campanel dla giostra.
E me an capiva
se al gir l’era già fnid o l’arcmincieva.
La vita di Al Fiol ad Bacanén (Cattolica)
Iocc chi vonta,
luvacion,
pin ad vita
pù…
tra ‘na caghéda
e un’enta
l’è pasa via…
senza gnénca
incorg-sne.
Isè,
tra ‘na caghéda
e un’enta.
La fede di Vincenzo Cecchini (Cattolica)
Per avè fede
al basta cred e basta.
T’po cred ma quel cut per,
bast che ti creda.
An t’è da cred però
ma quii ch’i t dis da cred.
An vria es drénta i tu pan di Giuseppe ‘Peter’ Tonti (Cattolica)
A simie tal cafè a fè la ciacareda
cume sempre un po’ infugheda
quante un sa la facia trista
el dis “burdèl” a vi vist la lista?
va a fnì cal sucèd cume Murcién
quist a nè du democris-cién?
Ha ho capì tal gir d’un sgond
cui i’era casch ma dos al mond.
Parché ja decis in federazion
cume a gli’ha da es al spartizion
u me vnù par lù la cherna pulastrena
l’è fnì i temp ch’il dicidiva su ma la Vantena
a iò dit, Zulie, va a fnì che mal Cremlino
at stel pasa, el fà la su sezion Cimino.
Alora tvò savé cum la è la situazion
per quel cal riguerda a gli ‘elezion?
Al per che Piva e Gottifredi cl’è i tu iscrit
i ni fà cur, an tal sè, alora in t’l’ha dit:
L’arvenza snò chi dù chin gn’entra gnint
deleghed ma l’ultme sprint
Pietro, che sa la cisa un s’la coi
parché u n’è andè d’acord s’la su moi
i nel vò la mità di citadén
per cume la andè mal pérch marén
in più, se non bastassero stì crucci,
al per che dreda lù, ui sia Micucci
an gni si pudria dé ‘na proroga ad qualch més,
par sistemè quel che ja las suspes?
An gnè più tent da capè, o ben o mèl,
l’arvenza sno al geometra Cibel
che un sarà un gran luzne, ad dagh rasòn,
ma l’è tent cl’aspeta ad fora dal purtòn
e sì tì pori Pataca, sa cli menie pin ad cal
ut toca stè zit, e vutè per un cul zal
e ma ti ades, che tè quasi stentàn
ad digh, an vria es drénta i tù pan.
L’è fnì al temp che quji dla tù sezion
i mitiva su madòn sora madòn
magnand un pèz ad pén sl’udor ad renga
lavurand anche a la dmenga.
Felcia, Martell, ‘na stela rossa
e via a cantè Bandiera rossa
e quji che sa la beva ma la boca
jurleva i nost idee ins ‘ toca.
Amarcord quji chi giva “mi a so ros”,
e i mnéva mal mi bà, e il laseva drent un fos.
E i sì fra un pèra ad mis,
va a vutè cume sempre, quel che it dis
an t’cantarè più, Avanti popolo in cumpagnia
ma t’avrè da dì du Pater nostre e n’Ave Maria
ma a ho na nutizia cl’è ‘na bomba:
i ma dit che tal campsent, i s’arvolta drenta la tomba.
[img align=left]http://www.lapiazza.rn.it/maggio04/rassegna_poesia_dialettale3.jpg[/img] Cattolica, febbraio 1941. Da sinistra: Fausto Filippini, Elvino Morosini, Agostino Morosini, Luigi Mecchi (‘Zucaren’).
(Archivio fotografico Centro Culturale Polivalente di Cattolica)
Sal murajion di Fiero Gaudenzi (Cattolica)
Velie stes incalzedie dal vent
in cerca dal romb
la prova la fend li ond.
Mal timon al nonn, al ten la rota
mentre sla mena mancina
drent tla boca la pipa l’armusina.
Garben cal và pla fora
mentre sla querta i mariner
lavurand juserva al mer.
Qualcun jarnacia al cugol
aspitand da metla a moll.
Al muzz, al sbilorcia al paron
cl’avenza vers la pupa
per dé al cambie mal timon.
Sguerd trist sal murajion
ad quji chié andé in pension,
arcord chi va dalongh
tra tempestie e cavalun
mentre in qua e là
jariva jaciach si prim dulur.
Pass lent jariva d’avsen
mentre la batena dalongh
quasi un mez casen.
Luis cus dis! stamatena la và?
elt temp quand a navighemie
sa tutt i temp, sa tutt i vent.
Quand a simie in gir pal mond
i problema lij sbrigheva
li nost donn, li nost moi.
La mi granda la ha spataché
an scapes si la vò spusé,
avin fatt ‘na figuracia
i cià smnè tal mezz dla piaza.
Cara al mi Fafon, bruta situazion
da ogg ho capì, per nun al bell
l’è i ricord dalongh tal mer.
Cred ma me, da stamatena
a ho da fè mi sla mi Rusena
ma anche te sla tu Miclena!
La chèsa ad Grisc a Muntfior
di Pierino Galuzzi (Misano Adriatico)
A metà costa de mont di frèt,
andand vèrs la Vintena ad Castelnov,
ad zòta dla chèsa ad Firoc,
u iè una pièna sagl’iarvore è iuliv,
tra sti piente uiè la chèsa ad Grisc.
Grisc le andè via
e per parec ann un gnè ste nisciun,
ora e camin lè artorne a fe e fun!
ma u iè vnud a ste qualdun?
Scee, u l’ha compra un, cos, i lè,
Filep ad Berselli l’Onorevle,
u l’ha arciapa da cima a fond,
però per cumdela u n’ha badè mal spesie.
Fra la chèsa e la capana
u ià fat la piscina,
tra iuliv è chemp da tenis,
atl’èra pred e giardin.
Ora questa u né più
la chèsa d’un pori cuntadin,
perché atl’èra
un sved più e pajèr dla paia
e i pajèr de fen,
un gnè gnènca più al cadascie
dli fascin di spin e di geet,
atl’èra un gnè gnènca più
e broc, la trègia, pargher e u stirpador,
ades u iè un pel long duche sventla e tricolor.
La genta la perla e la disc:
“guerda chè Filep ach bela chèsa cla fat
du chè steva Grisc.
Anche se ui cambièsa è nom,
u sarà sempra la chèsa ad Grisc
per la nostra generazion”.
[img align=left]http://www.lapiazza.rn.it/maggio04/rassegna_poesia_dialettale4.jpg[/img] Spiaggia di Cattolica, 1940: gli strilloni. Da sinistra: Luciano Gennari, Delio Parma, Dante Bortolotti, Luciano Gaudenzi.
(Archivio fotografico Centro Culturale Polivalente di Cattolica)
Che luss di Fiero Gaudenzi (Cattolica)
Tal ved! an pend d’un fil
dala testa sina mai piid
al va via cal per un re
brett da milord, scherp da baron
gravata e camisa ad seda pura
li ha un prezz cal fà paura
per andé insen sa cla pachesa
l’ha fatt ‘na muda
clé una straneza.
Per cruv cal curpacc
che d’un elt al val la metà
l’ha fatt un luss
cl’ha spes meza eredità.
Us gira, us rimira,
al fà al pavon
anche i si vistid
l’arvenza un gnint.
La chevsa di Giuseppe Ferretti (Cattolica)
Av racont
d’un martidè,
d’una chevsa
ichè a Furlè.
La è mnu
tra du cuntaden
per via d’un chen
e dli galen.
L’è ste un ches
che ho capitè
per cla chevsa
d’ascultè.
Avuched,
giudice, cunsiglier,
pront per fè
e su duer.
E campanel
l’ha dè partenza
e supte
us è vert l’udienza.
E pretor:
– Faccia entrare l’imputato
che dovrà essere
interrogato
e giuri di dir
la verità,
niente altro
che la verità.
Lei è il signor
Pietro Mancini,
quello che il suo cane
mangia polli oltre i confini?-
Pietro: – Me sgnor pretor
ai pos dì
che e mi chen
a l’ho istruì,
lu l’aparten
ma la nostra famea,
anden d’acord
d’na maravea:
l’è eduched,
l’è inteligent,
e magna e bè,
an fa i cumpliment
e in quant
a dli galen
su gli ha magnè
l’ha fat ben
perché li galen
li ma rubè e gren
ch’a ho simnè
sa li mi men
e sa poca
conclusion
qui chi roba
i va in prison,
li galen
l’è animel,
al su prison
l’è li budel. –
E pretor: – Signor Pietro
non stia a vantare,
siamo noi
a giudicare,
che faccia bene
oppure male
si ricordi
che è in tribunale!
Dica un po’
signor Pietro
e le galline
nel suo retro? –
Pietro: – Sgnor pretor
an li pos tnì
e mi chen
ul fa sparì,
e per lu e pul
l’è una cosa luva,
ul magnia tuttie
ma chesa sua!
Aveva una cioca
si plen,
l’ha fat pulì
anche sota e cren. –
E pretor: – Signor Pietro
voglio dire
che il suo cane
è da punire
e non lo lasci
più andare,
il suo cane
è da legare! –
Pietro: – Sgnor pretor
che vaga pien,
cum strapaza
e mi por chen,
ma cla pora
bistciulena
a lighel
ma cla cadena,
l’è cumè
s’t’l’amaz,
l’è abitued
sempre d’andè a spas!
Sgnor pretor
lu l’ha rason,
che meta post
sta quistcion,
me quant
a l’ho lighè
um toca anche
ad dei da magnè!
Lu cui creda
se o na
me ai ho det
la verità. –
E pretor:
– Faccia entrare l’imputata,
la seconda
interrogata,
la signora
delle galline
che han fatto
brutta fine!
Signora,
dove lei risponderà
deve dir
la verità! –
La sgnora:
– Me sgnor pretor
ai pos giurì
sora i mi fiol.
Pietre
un gna det la verità,
ui è nù
s’la falsità.
Me aveva ‘na cioca
sa sdot plen
ma in paseva
mai i cunfen!
La i ha bitued
la su ma
ch’un s’pudeva
at pasè ad là,
e per
pasè
ui è un fos,
bsogna saltè,
cum fa saltè un fos
‘na galena
ch’la ha do gamb
ch’li sved apena?
L’an tira minga
su al suten
cum a fen
nun don s’li men. –
E pretor: – Ma signora
lei è in errore,
vuol ingannare
anche il pretore?
Ha giurato
di dir la verità
sopra i suoi figli
e non ne ha,
e in quanto
alle galline
possono passare
anche il confine:
la gallina
per saltare,
con le ali,
naturale! –
La sgnora: – Sgnor pretor
an deg più quel,
an gn’aveva pens
ch’l’ha aveva a gli el!
Ch’um scuserà,
an ho fat dinuncia,
ai n’ho un’enta
at fei la giunta
che quand Pietro
u la sentirà
sarà custret
ad no dì d’na. –
E pretor: – Lei signora
è sotto interrogazione,
dica pure
se ha ragione! –
La sgnora:-El sgnor Pietre
an m’ha minga dinuncè
quand ma me e fos
u m’ha fat saltè,
u m’ha ‘ncantunè
sot una vida
e me a i ho det
da fela fnida,
e trop
l’ha lutè
a trastulis
ilè sa me.
E quest ui per
‘na cosa bela?
Un è na cosa
ad cundanela? –
E pretor: – Ma signora,
per Pietro non è un disonore,
l’uomo è detto
cacciatore,
è lei che doveva
aver prudenza
a tener stretta
la coscienza
e non cercarlo
di accostare
ma poterlo
allontanare! –
La sgnora: – Sgnor pretor
lu l’ha rason
perché an la sa tuta
la quistcion!
Cla volta l’era
cacia ciusa
quand l’ha mes al men
mai ptun dla busa,
spurcacion
um l’ha fat veda,
a so ste custreta
ad metme da seda.
E na sera
u m’ha seguì
te let mi
l’è nu a durmì
e mi marid,
bon e sincer,
l’è andè a durmì
spesa e paer,
invece Pietre,
cl’usurai,
e va in cerca
sempre i guai.
Me, sgnor pretor,
an perle più,
s’ul vo cundanè
che l’facia lu,
ma la lege
l’an amet
che Pietre e posa
fè anche bec.
Me a ho let
i cumandament
che el Signor l’ha las
ma tut la gent:
la dona ad ch’ielt
ad lasela stè
invece che porc ad Pietre
ma prufited! –
El pretor
us elza in pid,
us gira ad là
e us met a rid,
cunsiglier
tut in fila,
e la corte
la s’ritira.
I s’è mes
ad che salon
per giudichè
li su rason
e d’infat,
dop ad mezora,
tut insen
i è scap ad fora.
E giudice dop fat
la su presenza
ui ha let
la gran sentenza:
– Caro Pietro,
è giudicato,
il comandamento
va rispettato,
ti dico questo
per impararti
a non desiderar
la donna d’altri.
Non ti condanno,
signor Pietro,
ma a lei non andar
più di dietro!
E a lei signora:
il suo terreno verrà recintato
con un robusto
filo spinato,
all’altezza
di un metro
che non possa
saltar Pietro.
Fin qui
ho giudicato io,
poi la condanna
ve la darà Dio. –
