[b] La mi ma
di Vincenzo Cecchini
Cattolica [/b]
A canteva una canzon ma la mi ma per fela piegn.
E am la so scorda.
Lam purteva tut li stmenie mal campsent.
E an gni vag mai.
Stamatena ho arsantì sta canzuncina
e a so andè a cantela drimarena.
[b] Preghiera
di Vincenzo Cecchini
Cattolica [/b]
I dis c’an si sbaia a prighè mal Signor.
Mo me però a n’al cnos.
A pos pruvè
a dì ma la mi ma cla m’al presenta.
Però ho paura che quand a l’ho cnusù
am scord ad leia.
Me, an capès
di Al fiol ad Bacanèn
Cattolica
I fa la guèra pri purtè la pèsa…
An capés.
Tot d’arbaltùn cume barbari pri purtè la civiltà…
An capés.
I maza e i frés i burdèl pri arcuncèi sli protesi…
E an capés.
I spaca tut ni co’ pri custruì d’arnòv…
An capés.
I’afèma la genta pri purtei i’aiut umaniterie…
An capés.
I fa i priputént pri scunfèg i ditatur…
E an capés.
I ciàca la testa ma tut pri purtè la libertà…
An capés.
I ten tla fèma mèz mond e i zcùr d’giustizia…
An capés.
I fa li robie più brutie in nom ad Dio…
E an capés.
I dis cu i’è Dio, cl’è bon e giust si purit…
Me, an capés.
La ciòca
di Silvio Parma (Mangoc)
Cattolica
Tl’èera, iè un creen, l’è ad vinch
sòta, iè la ciòca si pulcin
al magnè l’è t’un tighèm at tèra còta
e al beev t’un còcc cal fa da bòta
ià al calor dla mà, e ugn’amènca quèll
ma i civla sempre e i sbatt li èll
tal ciell, iè una nuvla pina at piòva
e loor is bagna toot, in seen sla ciòca
l’azdoora, lai va vicin, la èlza al creen
e toot i coor tla stala soora al feen
fnidd la piòva, l’artorna al bèel
e soopte, i va a pizghèe al grèn sòta al paièr
ma quand l’è seera, e li èll, la èlza la ciòca
i va da lèia, e tal silenzie i pasa la nòta.
Madona che impression!
di Annunzio Livi (Nunzio)
Cattolica
Madona che impression,
alzes una matena e guardess drenta tel specc
e a vedme cum a sò dvent vecc,
um sembra jer che a giugheva sai panlein
sota l’ombra ti giardein.
Madona che impression,
se a a butt j-occ ma che spiazzel
ducc ai andeva da burdel
a fè e fog per Sant’Antonie
per incontrè un sguerd ad bellie donie,
a vegh che j’ha fatt un palazon chl’è una brutura
tout fer e ciment che a guardel ut mett paura.
Madona che impression,
ad cum a sò cambiè, cum l’è cambiè la genta
che più ad gnint la j’è contenta,
cum l’è cambiè la mi città
ma per dila sa tuta sincerità
an è tent el temp cl’è pass
che um crea un imbarazz,
l’è quel che per me l’avrà da vnì
che, cridim, sai pens, um fa rabbrividì.
La nota ad San Lurenz
di Annunzio Livi (Nunzio)
Cattolica
T’el scùr ad stà nòta magica
a stag a scrutè el ciel,
a j’aspet ad veda caschè na stèla
per esprim un gran desiderie.
Avria ar-veda snò per un mument,
per un istènt, el mi bà, la mi mà,
el mi fradel, e tut ch’ielt
che i m’ha vlù ben.
Ma li stèlie l’in casca,
el mì sogne el scapa via
e us’afoga t’el silenzie
lassandme sla mì tristeza,
… e us’è già fat el dì!
E puret
di Giuseppe Ferretti
Cattolica
E puret
do cl’è ndè fnì,
s’ai pansen sora
l’ha sparì.
Per ches
l’altra matena,
nind giù
da Pianventena,
da seda
s’un grep
a ho det:
-quell’è un puret-.
A ho ralent
s’na gran frineda,
am so port
tut foristreda,
per una
curiosità
ai voi dmandè
ando che va
e per fei
un discurset,
e sl’è vera
cl’è un puret.
Ai ho det:
-Bon om ando c’andè?
Un pasag
a ve pos dè,
a ho vest
ca si a pid-.
Um dà n’uceda
e us met a rid,
um rispond
s’na facia alegra:
-A so ste a Murcen
a vend na pegra.
L’era una
pigraza,
la era soda
e l’an feva raza,
l’an era vecia
l’era un’agnela,
aveva dicìs ad metla
sla gradela,
ma um bsugneva
i quatren
a la ho vindù
m’un faturen
ades ma chesa
um è arvenz e ber,
sbarbagian
d’un imbicel,
e sta sempre
sla su ma,
se ai port na pegra
us gira ad là,
ma se cuntenua
a fem rabiè,
a ho dicìs
a t’fel castrè.
Ades am’elz
e a voi partì
um arvenza sol
a salutit
e a va ringrezie
de pasag
a ho vu sempre
de curag
a ho 76 an
im dis Luis
a n’ho fat
dla streda a pid
me a so un om
ca n’ha mai freta
an vag gnenca
in bicicleta.
T’ved sbaston
sa stl’algacina
questa a la us
cume benzina
am so fat
a dna rason
an peg ne bol
e ne sigurazion
e gnenca
un accident c’ui spaca
an vag gnenca
mai a sbata
l’è nu fora
e quarentot
la 127
la 128
la 2000
la 2100
i va fort
tut cume e vent
la genta
i è tut mat
però ogni tent
lor i va a sbat
e sent a dì
in qua e in là
ch’un mor più
d’una metà,
in ven a dì
ch’iè la miseria
e ch’i afari
i vola tl’eria
sa che rumor
e fischiament
i fa paura
ma la gent
e ogni tent
i si sfragela
e uv per
na cosa bela?
Lasena perd
lasena ste
si no a fac nota
ichè sa te
e dii pu
mai giuvne d’ades
chi stag atenti
da fe prugres
lor vidend ma me
is met a rid
sa chi scarvac
ca ho ti pid
ma a so fort
e am sent sigur
a ho partì stamatena
drent e scur
a ho partì
da Fanen
sa cla pegra
drenta al men
e mi cunsiglie
chi l’ascolta pu’
si vo campè
qualc’an ad più.
E guerda
ed fai capì
ch’iè tent modi
ad divertis
specialment
el temp d’ades
sa cli don
del nov prugres
se t’li incontre
drent’e scur
li dmanda lorie
ad fè l’amor
specialment
sa t’ve a balè
mel tavlen
li t’vo purtè
e se t’li stres
s’un po’ at pasion
li t’pega anche
la cunsumazion
e li dis
d’andè a durmì,
quel se
cl’è prugredì,
ne cum l’usiva
50 an fa
cui feva la flepa
la su ma.
Agl’aveva
la sutena se fioc
al mudand
lighè me snoc
s’na fitucia
ligheda per sora,
per svrucila
ui vleva mezora
e se per caso
tu i vliva de un bes
t’inciampev
sigur tel nes
per non fes veda
dala su ma
cla era ad schent
un po’ più in là.
Sai pensen sora,
un ven da rid,
per fè l’amor
ancrusemie i pid
e didreda,
s’la aveva d’andè,
la t’feva ciuflè
o pur cantè.
Dmandèi pu’
mai vost non s’iè viv
sa gl’iè vera
al parol d’Luis.
At’arsalut
alzand al men
e nirà un dè
ca ci arcuntren.
Me tu sbai
nu pensie più
che e puret
un esist più-.
