E Nost Signor l’è sempre sorprendent
si Su Miracol, uj fa gema “Da Onipotent’,
roba da no cred, per mé in era te cont,
l’ha fat andé tla Cisa quej de Mont.
L’era d’agost, un cheld c’un s’feva per,
la Madona prima i la eva porta in mer,
mè a s’era ilè aspitè se mì trumbon
per suné s’la banda drè ma la purcizion.
Ujera d’aspité inquant l’era trop prest,
ho girì, ho vest la Cisa e tut e rest
e a vuj racunté che um ha las surpres
l’ategiament vers la Cisa d’ogni Montalbanes.
Per pasé e temp a ciacaré am so mes
s’un sgnor che an cnusiva e um ha permes
quest da imparé dli robe pusitive, realtà
cera deta da St’Om che e sa ben la verità
inquant a un cert punt, isè, curiosament,
ajò dmand: a sì un pret? Un era isé evident,
e vistiva burghes. Lù: sé e am facc un vent
ad quest, a sò e Paroco e a sò Iché da tent.
Un om ad parola facile, alora ho racont
cumé che a cnusiva una volta Quej de Mont.
Ho dett che quané mé a s’era znen,
Ilé si prit i feva al pulpete e e spizaden
senza però cje nisun mai l’avesa sta certeza,
a parole i si magneva che l’era una beleza.
Quand jera imbivud, drenta tl’usteria,
a l’ho verifiché daventi chesa mia,
contra i prit, te circle cumunesta,
il giva tente che lan fniva mai la lesta,
il canteva, is impruviseva di tenur
isé stuned che u si scanseva i mur,
bicir pin e avanti popolo alla riscossa
che lan mancheva mai, bandiera rossa,
quest e sucidiva enché te circle dli Casacc
dov ca so ned, sota ste Mont di stracc.
Ho racont che e mi Bà l’era enché Lù stracer
cumé tut quest mo jarcujva ad più e fer,
qualcdun l’ha fat di sold, qualcdun na,
fra quej ch’in gna fat ujé sté enché e mi Bà,
am arcord qualc nom a ches, in era ad lus,
Mafei, Giafin, Magior, Canapa, Biribus,
l’é pas quasi sent’an da quel che a racont,
um per un insugne arveda Quei de Mont
chi fa la purcizion e jà Cisa e campanil,
jà fat un gros cambiament, bsegna pu dil.
Us é mes a rid, l’ha dett: a cnos sta roba,
jé mej ca ne at d’ielt post, l’è tuta boba
chi feva, mu mé im vò ben, a fac volentier
già da trent’an meza Lor e Mi Minister.
L’arviva la Madona, la feva e Su ingres,
mé a so andé a suné, e pret a pripares,
tut e Mont l’era pront per cla sireda ad gala
illumined cumé durent la guera si bengala,
ho pens; sent’an jé gnint mo e cambiament
d’un post dli volte l’è propria sorprendent
quanté un ul ved da sec e un s’l’aspeta,
e sent a dì che me pret enché il rispeta,
l’arman cuntent, se pased e fa e cunfront
e ad cor e manda un salut ma “Quej de Mont”
Mario Tonini (Riccione)
