“La nebia a gl’irti colli”
emenc la esist ancora,
e mer enchè e dà fora
pricis ad cent an fa
quantè c’ul punza e vent
contra al nov scogliere
cal forma cli bariere
cla fa la civiltà
ad ogg per cuntrastè
s’la pò anché la natura
a prezie d’na brutura
per toi la libertà
da movse a Su piaser
sghend un gren disegn
che l’om se Su ingegn
imaginé un putrà
mai per quant us prova
da fè e da disfè
finend per pruvuchè
di guai in quantità.
E spiedo enché l’esist
mo si pull d’alevament
che i forma l’aliment
dla nova società.
L’udor de ven che boll
e ven da i cantinun,
un ralegra più nisun,
cum il pastruciarà?
Se guerda su te cel
un arved tut chi raz nir
e caciador, jè andè in gir,
chisà dov chi sarà?
Sigur da un’enta perta
duvè che i pò campè,
iché is pò invilinè,
gnenca scher ch’jarturnarà.
L’è armast sempre pricis
sol l’om cativ o bon
sa tute al Su ambizion
e mai e cambiarà.
Mario Tonini
