Tot l’è cminz ilà so me Castel,
isè um racunteva e mi fradel:
quand che a mareina un gn’era nison,
na muliga a Catolga e menc a Arcion.
Sla mareina l’era burg ad piscadur
e indrì sla tera e cmandeva i sgnur.
I cuntadein iera tott a mezadria
e l’era fadiga tri avanti la famia.
La miseria las tajeva sla curtela,
mo i dis che la vita l’era piò bela.
Us campeva tal ca’ e dreinta i ghett,
l’era gnara, ach vita ch’feva chi purett!
E ghet ad Grel l’è ilà sota Scacen
e ghet ad Bastela piò insò ad Fagnen,
sota e Mont Ca’ Salvagn, Ca’ Andrein e Ca’ Francion,
a mareina l’era e Fnil, mo un gn’era nison,
ma la Cela ad Simbein, ma l’Ag-na e Ca’ Rastel
me Fend , mi Laghett, mal Casete e Ca’ Rafael.
E po pianein pianein l’è arvat i tugnin
albergh, pension, prived: l’era tott pin.
U iè ste e svilop dal chese e de cimint:
Santa Monica e Vilag andò ch’un gnera gnint.
L’autodromo sla pesta e al curse si mutur
prufom dl’oglie ad re-cne e sempre bei rumur,
curse impurtente e curidur da tott e mond
per tott noun l’era una pasion cla giriva a tond.
Tott e pasa e us va sempre dnenz,
mo per noun burdel poc l’è arvenz.
Arvat ma chesa da la scola, saltrein la cartela
e via ilà te chemp de prit o sla caratela,
a giughi a biglliardein in sagrestia o a palon,
sinè via in bicicleta tla Conca o me Funtanon.
Chi sal piastre, chi a batmur o chi sal paleine
us giughiva qualc sold o sal figureine.
L’è i arcord d’un burdel e de su paes
che in mor e i ha sempre e stess pes .
Glauco Selva
